Qasigiannguit – arferit angerlarsimaffiat.

Qasigiannguit Qeqertarsuup Tunuani kusanarluinnartumik inissisimavoq, qaqqanillu 450 meterinik portussuseqartunik tunuliaqutserneqarsimalluni. Qasigiannguit maannakkut illoqarfiuvoq nutaaliaasoq, kisiannili imak angitiginani allaat nunaqarfittut periuseq katanneqarsimalluni, sunami tamaat pisuinnarluni orninneqarsinnaavoq. Qasigiannguit qanittuani pinngortitaq pisuttualaarnissanut tulluarluinnarpoq, iluatsitsigaanni piffimmi umimmaat takuneqarsinnaasarlutik.

Angallammik Qasigiannguanut

Angallammik Ilulissaniit Qasigiannguanut misigisassaavoq immikkuullarilluinnartoq. Ilulissani umiarsualivimmiit aallarnitsinniit minutsit 5-t qaangiunnerinnaani ilulissat siulliit takussaasarput. Iluliarujussuit Ilulissat tusaamaneqaatai ilulissat kangerluani takussaapput. Kangerluk iluliaqarfik UNESCOp eriagisassatut allattorsimaffianut 2004-mi inissinneqarsimavoq. Tassunga inissinneqarnermut pissutaasoq pingaarnerpaaq tassaasimalluni geologiikkut sikulerinikkullu naleqassusaa, kisiannili aamma kusanarluinnarnera – nammineerlutit nalileruk! Silagitsillugu ilaasut angallatip silataani aneerujoortarput, puisinik, arfernik imaluunniit ilulissanik marserlutik. Arfernik takungaanni, angallammi inuttat taanna saattarpaat, misigisarlu taanna pingaarnerpaanngortittarlugu. Iluliaqarfiup ikkattup kujatinnguani nunami qisunnik illuliat qalipaatigissut takuneqarsinnaapput, tassa nunaqarfik Ilimanaq. Qasigiannguanut tikinnermi nuunnguami qulaani Hotel Diskobay takuneqarsinnaavoq, umiarsualivimmut Qeqertarsuullu Tunuanut isikkiveqarluni.

Qasigiannguit illoqarfiuvoq kalaallit qanga inooriaasaannik inooriaaseqarfiusoq. Qimussit ulluinnarni ilaatigut angallatitut suli atorneqartarput, umiarsualivik pisoqarfiulluarluniarpoq, aquuteralaat iluliarsuit akornanni aalisariarlutik aallartut tikerartullu.

 

Pinngortitamik pisuttuarnermillu Qasigiannguit nunataani misigisassat

Qasigiannguit inuinnarnit arferit illoqarfiannik taaneqartarpoq. Akutsunngitsunik qipoqqat Qeqertarsuup Tunuata kujasissortaani nerisassaminnik katersiniarlutik katersuuttarput. Aasaanerani (maajimiit septembarimut) arferit anerneri arferillu avataani – amerlasuutigut sineriammut qanittumi takussaakkajuttarput. Qasigiannguup tunulequtaani pisuttuarnissamut periarfissaqarluarpoq. Sarsarfimmut pisunnissaq maninneruvoq, assoroornarnerusumilli pisukkumasunut ”Isikkivik” innersuunneqarluarsinnaavoq, Qeqertarsuup Tunua tamakkerlugu Diskollu qeqertaanut (100 km-ingajammik ungasitsigisumiittumut) isikkiveqarluni.

Katersugaasivik asimioqarfillu ammaannartoq

Illoqarfimmi katersugaasiveqarpoq soqutiginarluinnartumik. Nassaarineqarsimasut immikkuullarissut arlallit tassani kisimi takusassaallutik. Sapaammi katersugaasivik asimioqardimmik ammaannartumik aaqqissuikkajuttarpoq. Asimioqarfik ammaannartoq illoqarfimmi kajumissutsiminnik sulisunik aaqqissuunneqartarpoq. Tassani amminik qangatut atisalianik, qangalu kalaalliit sammisarsimasaannik takutitsisarlutik. Puisinik pilallutik, tivallutik, sanalullutik, puisit amiinik atisaliorlutik ikumatitamilu nerisassiorlutik. Amerlasuutigut qaannat qaannat nuisinneqartarput, arnallu umiami naapisimaartarlutik, soorlu tassa piffissami uterluni. Pisartoq taanna namminneq kajumissutsiminnik sulisunit inerlanneqartarmat, illit taakaniinnerni ingerlanneqarnissaa qulakkeerinnissutigisinnaanngilarput.

 
 
Misigisassat neqeroorutillu
  • Qasigiannguit katersugaasiviat
  • Illoqarfimmi pisuttuarneq
  • Ineqarfik ammaannartoq - aasaanerani sapaatit aalajagersimasut
Piffimmi misigisassat akeqanngitsut
  • Kangerlulimmut pisuttuarneq
  • Qaqqaq Isikkivik 456 meterinik portussusilik qaqiuk
  • Sarfarfimmi aalisarneq
  • Illoqarfimmi pisuttuarneq
  • Kalaalimineerniarfimmut takuniaaneq
  • Qasigiannguit eqqaani qaqqani umimmannik takuniarneq
  • Illuikkiat oqaluttuarisaanermut tunngassusillit
  • Qasigiannguit oqaluffiani naalagiarneq
  • Aasaanerani sineriammiit arfernik takuniaaneq - takunissaq qulakkeerinnissutaasinnaanngilaq
Illoqarfimmi akunnittarfik
  • Hotel Diskobay