Hotel Disko - Qeqertarsuaq

Qeqertarsuaq geologiimut tunngaviit malillugit Kalaallit Nunaani nunavittamiit nutaajunerugaatsiarpoq, taamaattumillu allaanerulluinnarluni. Qeqertap annersaa qaqqarsuarnik portusuunik innaaqqissunillu peqarpoq, ukiut millionilikkaat 25-it 65-illu matuma siorna innermik anitsinikkut pinngorsimasut. Naak qeqertaq nunatavimmiit 100 km-inik ungasitsigigaluartoq, Qeqertarsuup Tunuani illoqarfinniit tamanit silagitsillugu takuneqarsinnaasarpoq. Qeqertarsuaq inissisimalluarpoq, Qeqertarsuup Tunuani inissisimalluni, illoqarfiullu tunuani qaqqassaarsuit kusanarluinnarlutik inissisimallutik. Illoqarfiup akiani qammami ”Lyngmarksbræen" inissisimavoq, Kalaallillu Nunaanni kisiartat ilaattut aasakkut qimusserlutit misilissinnaavat. Diskop qeqertaa Kalaallit Nunaanni qeqertat annersaraat, Sjælland-itullu angitigaluni. Tassani qeqertami illoqarfik ataasiinnaavoq, tassa Qeqertarsuaq, nunaqarfillu Kangerluk. Pinngortitap sinnera inoqarfiunngilaq, issittormioqarfittullu nunataa naasoqarneralu assigiinngiiaarluni.

Hotel Disko illoqarfiup qeqqani inissiani assigiinngitsuni sisamani imminnut qanitsuni inissisimavoq. Inissiat ilaat nunasiaatitut aqutsisumut najugaqarfiusimalluni. Akunnittarfik 19-inik ininik marluuttakkanik peqarpoq ininillu ataasiittakkanik tallimanik immikkut uffarfeqarlutillu perusuersartarfilinnik neqerooruteqarpoq. Ullaakkorsiorneq akianut ilaareerpoq. (Kaajallaallutit angalanissarnut pitsaassuseq pitsaanerpaaq toqqarukku, taava Hotel Disko-mi inimik tunineqassaatit).

Init

Panorama Hostel

Vandrehjemmi Tele-p illuutikuani inissisimavoq, taamaallaallu 1 km-imik umiarsualivimmiit inissisimalluni. Tassani arfinilinnik ineqarpoq, tamarmik siniffinnik quleriiaannik marlunnik peqartunik. Tassanittaaq iggaveeraqarpoq ineqarlunilu ataatsimoorujoorfissamik. Init tamarmik oqoruserneqareersimapput, ullaakkorsiornerlu aamma akianut ilaareerluni. Ullaakkorsiorneq Hotel Disko-mi ingerlanneqartarpoq.

Siorarsuit Hostel

Tassani immikkut uffarfeqaranilu perusuersartarfeqanngilaq. Init tamarmik oqorusersugaareerput, ullaakkorsiornerlu aamma akianut ilaareerluni. Ullaakkorsiorneq Hotel Disko-mi pisarpoq. (Kaajallaallutit angalanissat inniminnernerani akikinnerpaaq toqqarukku, taava vandrehjemmimut Panorama Hostel-imut imaluunniit Siorarsuarnut inissinneqassaatit).

Qeqertarsuarmut angalaneq

Angallammik angalaneq Ilulissaniit Qeqertarsuarnut akunnernik 4 ½-nik sivisussuseqarpoq. Ilulissani umiarsualivimmiit aallarnitsinniit minutsit 5-t qaangiunnerinnaani ilulissat siulliit takussaasarput. Iluliarujussuit Ilulissat tusaamaneqaatai ilulissat kangerluani takussaapput. Kitaanut 100 km-it missaanni ungasitsigisumi ornitarput, Qeqertarsuaq, inissisimavoq. Isikkivigitsillugu misinnartarpoq kilomeeterit 20-t 30-illuunniit missaanni taamaallaat ungasissuseqartoq. Qaqqarsuit portusuut innaaqqissullu 1.200 meterit missaanni portussuseqarput, qulaannilu sermersuarujussuaqarluni, taakkulu aasakkut kusanarluinnartunik kuussuarnik pilersitsisarlutik. Aqqutaa tamangajaat arfernik takusinnaanermut periarfissaqarluarpoq, Qeqertarsuulli saavani aasaanerani qipoqqat neriffinnaaqarput.