Glacier Lodge Eqi 

Ilulissaniit avannamut 70 km-inik ungasitsigisumi kusanarluinnartumik asseqangingajattumik pinngortitaqarpoq: Eqip Sermia, ulluinnarni ”Eqi”-mik taaneqartartoq. Sermersuup imaanut ujangisimanera 3,4 km-inik takissuseqarpoq, naqqaniillu qummut 200 meterit missaannik portussuseqarluni, 30 meteriniit 180 meterit imaq qulaallugu.

Eqi pisoqarfiugaatsiartarpoq, agguaqatigiisillugu akunnermut ataasiarluni uukkaasarpoq, taamaattumillu qulakkiissutigisinnaavarput sermersuup uukkaaneranik takunissat. Nipi nipitoorujussuaq ilulissat immamut nakkaannginnerini tusaasassaavoq.

Glacier Lodge Eqi: Glacier Lodge Eqi nunaannarmi akunnittarfiuvoq, 15-inik unnuiffissanik nuannersakkanik illuaraqarluni. Illuaqqat tamarmik aneerasaartarfeqarput, kusanarluinnartumik sermersuup tungaanut isikkiveqarlutik. Illuaqqanut atatillugu cafe-mik pilersitsisoqarsimavoq. Café Victor-imi ullaakkorsiortoqarsinnaavoq ullup qeqqasiortoqarsinnaalluni unnukkorsiortoqarsinnaallunilu, nerisaqarneq akimut ilaareerpoq, imigassalli nammineq saniatigut akilerneqassallutik.   

Illuaqqat

Glacier Lodge Eqi-mi illuaqqat tunngavittut inunnut marlunnut tulluarsagaapput. Illuaqqat aaqqissuunneqarsimapput pitsaasunik siniffilerlugit, qipiit, akisit, oqorutit allarutillu pigalugit. Nalaasaarfinnittaaq peqarput, issiaviit umimmaat meqquinik qallikkanik peqarlutik, taakku aneerasaartarfimut nassarneqarluarsinnaallutik. Eqi-mi pinngortitaq paarilluarneqartarpoq, taamaattumillu illuaqqat akornanni pisuffissanik sanasoqarsimalluni. 

Superior+ værelse

Illuaqqat ilorrisimaarfiit

Glacier Lodge Eqi-mi illuaqqani ilorrisimaarfiit pinngortitami ilorrisimaarnissamik takorluukkamit pitsaanerujussuupput.

Immikkut illuaqqami unnuissaasi, sermersuup tungaanut ingalaarsualikkamik isikkivilerlusi. Isikkivik siniffimmiit, nalaasaarfimmiit aneerasaartarfimmiilluunniit isiginnaaruk. Unnuaanerani seqerngup kaaviinnarfiani sinissinnaanngikkuit saagorsinnaavutit.

Illuaqqat natikkut kissassagaapput, uffarfeqarlutik, imeq kuuinnartoq, anartarfik kuutsittagaq, ulluinnarni atortakkatsinnit allaanerugaanngittunik atortoqarluni. Innaallagiaq qaliani seqerngup qinngorneranik innaallagissiorfimmeersuuvoq, imerlu ungasinngitsumi sermersuup aanneranit tatsimeersuulluni, taannalu aamma seqerngup qinngorneranit kiassagaalluni.

Ulloq naallugu nerisaqarneq akianut ilaareerpoq, imigassalli nammineq saniatigut akilerneqassallutik. Café Victor-imi nerisassat sassaalliutigineqartarput. 

Illuaqqat naliginnaasut

Glacier Lodge Eqi-mi illuaqqat naliginnaasut inoqanngitsumi misigisaqarnissamut tulluarluinnarput.

Illuaqqanit naliginnaasuniit sermersuarmut pitsaalluinnartumik isikkiveqarpoq. Illuaqqap aneerasaartarfianiit illuaqqamiluunniit issiavimmiit isikkivik immikkuullarissoq isiginnaarujoorsinnaavat.

Illuaqqani pitsaasunik siniffeqarpoq, gas-imik kiassaateqarluni asaffissaqarlunilu. Illuaqqani innaallagiaqanngilaq, ukiariartorneranilu tikissaguit qulliit batteritortut ikittarnissaat pisariaqassajunnarsilluni. Aasaanerani seqerngup qinngorneri qaammaqqutituatut atortarpagut.

Ulloq naallugu nerisaqarneq akianut ilaareerpoq, imigassalli nammineq saniatigut akilerneqassallutik. Café Victor-imi nerisassat sassaalliutigineqartarput. 

Glacier Lodge Eqi-mut angalaneq

Glacier Lodge Eqi-mut angalaneq pillugu:

Nal. 09.00 Ilulissaniit Eqi-mut angallammik aallarneq. (World of Greenland-ip allaffiata eqqaani nal. 08:45 naapinneq) Takornariartitsisutta aqqutaani pinngortitaq aqqusaakkallu oqaluttuarissavai. Amerlanertigut Kangiani sermersuarmiit iluliarsuit, puisit arferillu takussaasarput. Nunaqarfittaaq oqaatsut sanioqqunneqassaaq, immamut qanittumi kusanartumik inissisimalluni illutaalu qalipaatigillutik. Angalaarnermi kaffi tiilu sassaalliutigineqassapput. Immiaaqqat sodavand-illu saniatigut pisiarineqarsinnaapput.

Nal. 12.30 Eqi-mut tikissaagut. Sermersuarujussuup isiginnaarnerata nalaani, ullup qeqqasiutissat sassaalliutigineqassapput (akianut ilaareerpoq). Akunnerit 2-k missaanni sermersuup saavani uninngaassaagut, tassanilu sermersuup uukkaanerata alutornarluinnartup takunissaanut periarfissaqarluassaaq.

Nal. 14.30 Port Victor-imut apuutissaagut, Ice Camp Eqi-mi tulattarfik. Ilaasut unnuisussat niuneqassapput, ilaasullu sinneri angallammiiginnarlutik. Nunami Eqi-mi takornariartitsisut tikilluaqqusissapput illuarassarnullu innersuullutit. Eqi-mut tikerlaat Café Victor-imi naapissapput, tassani kaffimik kaagimillu sassaalliisoqassalluni, utaqqiisaa takornariartitsisut piffimmi paasissutissanik paasissutissiissallutik. Tamatuma kingorna ullup sinnera nammineerluni atorneqassaaq.

Ullormi aallarfissami morænen-imut (nuna sermip nassatarisimasaanut) takornariartitsisulerluni pisuttuartoqarsinnaavoq (pisuttuarnissaq Eqi-mi unnuinermi akianut ilaareerpoq). Café Victor-imiit pisulluta nal. 09.00 aallassaagut. Tasinngortaq kaajallallugu sermersuaq qanilliivillugu pisussaagut. Nuna sermip nassatarisimasaaniit sermersuup quppaanut kusanarluinnartumik isikkiveqarpoq, aammattaarlu Glacier Lodge Eqi-mut kusanagaartumik isikkiveqarluni. Ineqarfik ungasianiit toorneeqqatut isikkoqarluni nunap avatagiisillu angeqisup akornani takuneqarsinnaavoq.

Glacier Lodge Eqi-mit ullormi aallarfissami nal. 14.30 aallartoqassaaq. Angallat aqqut aqqutigisimasaq malillugu utissaaq. Aqqutaani kaffi/tii kaagillu sassaalliutigineqassapput (akianut ilaareerput). Ilulissanut nal. 18.00-ip missaani tikissaagut.

Siunnersuutissat: Aqqutaani Kalaallit Nunaata inoqannginnersaa nunaqarfiillu sanioqqunneqassapput. Alapernaatsunut puisinik arfernillu takusinnaaneq periarfissaqarluarpoq. 

Eqi-mi misigisassat AKEQANNGITSUT

Eqi-mi misigisassat akeqanngitsut. Pisuttuarfissanik kusanarluinnartunik periarfissaqarpoq. Nunataata annersaa pisuffigiuminartuuvoq, tammarnissamullu periarfissaqarani. Ice Camp Eqi-mi sulisut soorunalimi pisuttuarfissanik siunnersuinissaminnut ikiuussinnaapput. Pisunnermut misilittakkat aallaavigalugit nammineq pisuttoqarsinnaavoq, imaluunniit takornariartitsisulerluni pisunnissamik pisisoqarsinnaalluni.

Angalanissamut periarfissat neqeroorutillu

Tasinngortamut, nunamut sermip nassataanut sermersuarmulluunniit pisuttuarnerit. Illuaqqaniit tasinngortartumut mikisumut, sermersuup kujataatungaaniittoq qaajallassavarput. Tasinngortartumi piaqqiorfiup nalaani nerlernik peqakkajuttarpoq. Tamatuma kingorna nunamut sermip nassatarisimasaanukassaagut, tassani sermersuup qupparujussui meterialunnguanik ungasissusillit takusinnaassallutigit. Tassanngaanniit sermersuup portussuserujussuata ilaa, meterit 70-it tikillugit portussusilik, minnerunngitsumillu sermersuup uukkaanera qanimut takusinnaassallutigu. Pisuttuarneq taanna akunnerit 4-t missaanni sivisussuseqarpoq. Morænen-imut takornariartitsisulerluni pisuttuarnissaq Eqi-mi unnuinissami akianut ilaareerpoq, ullormilu aallarfissami ullup qeqqata siorna ingerlanneqartarluni.

Ulloq naallugu sermersuarmut sermersuarmilu pisuttuarneq. Aqqut takillunilu nunataa pisuffissaq nikerartoq, naggorissoq, nunataa portusooq anorsaarissoq, nuna sermip nassatarisimasaa, minnerunngitsumillu sermersuaq quppaqarfiusoq, kooqartoq puilasoqarfiusorlu. Paul-Emile Victor-ip sermersuarmut aqqutigisimasaa atuassavarput. 1940-kkut naalerneranni 1950-ikkullu aallartinnerani Paul-Emile Victor-ip sermersuarmi ilisimasassarsiorluni angalanini maani ingerlassimavaa, ullumikkullu maskinarisimasaasa sinneri pituutarsuillu aqqutigisimasaat takussaapput. Qooqqumi kingullermi nunap sermip nassatarisimasaata tikinnginnerani ullup qeqqasiussaagut. Tamatumalu kingorna nunamut sermip nassataanukarlutalu sermersuarmut qaqissaagut. Sermersuup qaavani kilometerit 3-t missaanni pisussaagut, tassanilu qupparujussuit, kuuit sermersuullu puilasortai kusanarluinnartut takussallutigit. Pisungaatsiareerluta ullup naajartulernerani angerlamut apuutissaagut, tassanilu ilorrisimaarnarluinnartumik unnukkorsiussalluta.